បាត់ដំបង៖ នគរបាលខេត្តបាត់ដំបង ឃាត់ខ្លួនពលរដ្ឋខ្មែរចំនួន ១៣០នាក់ ខណៈពួកគេកំពុងលបលួចឆ្លងដែនចូលទៅក្មុងប្រទេសថៃដោយខុសច្បាប់កាលពីព្រឹកម្សិលមិញ។
មេបញ្ជាការវរសេនាតូចនគរបាលការពារព្រំដែនគោកលេខ ៨១៩ ខេត្តបាត់ដំបង លោកវរសេនីយ៍ឯក ម៉ង់ ស៊ី ឱ្យដឹងថា កម្លាំងនគរបាលព្រំដែនបានសហការជាមួយនគរបាលស្រុកកំរៀង កាលពីព្រឹកថ្ងៃទី១២ ខែតុលា ម្សិលមិញបានឃាត់ខ្លួនប្រជាពលរដ្ឋខ្មែរចំនួន ១៣០នាក់ ក្នុងនោះមានស្រី្តចំនួន ៥២នាក់ និងកុមារចំនួន ១៣នាក់ ខណៈដែលពួកគេប៉ុនប៉ងលបលួចឆ្លងដែនពីប្រទេសកម្ពុជាចូលទៅក្នុងប្រទេសថៃដោយខុសច្បាប់ ស្ថិតនៅចំណុចភូមិអូរដាលើ ឃុំបឹងរាំង ស្រុកកំរៀង ខេត្តបាត់ដំបង។
ក្រោយពីឃាត់ខ្លួនប្រជាពលរដ្ឋខ្មែរទាំង ១៣០នាក់ រហូតមកដល់ពេលនេះ សមត្ថកិច្ចបានបញ្ជូនពួកគាត់ប្រគល់ជូនសមត្ថកិច្ចនគរបាលស្រុកកំរៀង ដើម្បីស្រាវជ្រាវស្វែងរកមូលហេតុ និងស្វែងរកប្រភពមេខ្យល់ដែលជាអ្នកដឹកនាំប្រជាពលរដ្ឋលបលួចឆ្លងដែននេះដើម្បីអនុវត្តតាមផ្លូវច្បាប់៕